Деновиве, се` повеќе вработени и нивните лидери се жалат на преоптовареност од работа. Зар не би било супер ако постојат алтернативни начини како да се сфати работата, а тоа да не е копање на истите корени подлабоко и подлабоко? Лора Граснер Отинг, автор на книгата „Без граници: Како да ги игнорирате сите, да го издлабите сопствениот пат, и да го живеете вашиот најдобар живот“ е сигурна дека такви начини постојат. Таа верува дека бараме „созвучје“, т.е. чувството дека има прецизна врска меѓу она кои сме и она што го правиме, и дека организациите можат малку повеќе да се потрудат и да им помогнат на вработените да го пронајдат тоа созвучје, пишува Лиз Кислик, консултант и обучувач за извршен менаџмент.
- Претприемништвото по Ковид: претприемачки вештини за отпорност без кои не се може
- Како да ги поправите комуникациските грешки што создаваат конфузија на работното место
- Лидерите треба да поседуваат одредени меки вештини за тимот да биде поефикасен
Гаснер Отинг предлага: „Во овој момент, живееме во време кога секој си го поставува прашањето кога ,животот ќе се врати во нормала’, и дали тоа нормално кон кое се враќам е навистина животот што го сакам?“. Така што, сега е совршеното време организациите да ги анализираат сопствените практики: ако сакаат да бидат сигурни дека вработените се чувствуваат цврсто ангажирани и целосно придонесуваат, треба да вложат време и енергија да ги разберат мотивациите на секој вработен и потоа да ги применат во еден од следните четири области, и тогаш ќе можат да го извлечат најдоброто од сите.
Лидерите мора да сфатат дека не треба да бараат членовите на тимот да бидат како нив
Дури и да се многу успешни и задоволни со нивната работна филозофија и кариерна патека, Гаснер Отинг вели дека сега ризикот е поголем лидерите „да претпоставуваат дека тоа што не` мотивира, исто така го мотивира лицето од спротивната страна на нашето бирото“. Веќе не е практично лидерите да ги користат нивните лични приказни или истории како еден вид образец што членовите на тимот треба да го следат. Таа објаснува дека ако немаме внимателен разговор со цел да разбереме што ги мотивира вработените, тогаш „се` што правиме е да бараме од нив да ги штиклираат полињата во нашиот индекс за постигнати резултати… и потоа се запрашувате ,зошто не се мотивирани?’ Епа, не можете да бидете ненаситно гладни за целите на некој друг“.
Така што, клучно е да ги охрабрите вработените самите да ги артикулираат сопствените цели, и организациите да ги поддржат со целно кариерно планирање, креирање соодветна персонализирана кариера, и развивање вештините што ќе им овозможат да ги постигнат тие цели. Во спротивно, најверојатно или тие ќе се почувствуваат доволно далеку од она што тие навистина го сакаат па ќе одат на друго место каде можат да ги најдат тие работи, или полошо, ќе продолжат да доаѓаат на работа и ќе се влечкаат по цели денови, без вистинска посветеност или креативност.
За да ги привлечете членовите на вашиот тим, конципирајте ги вашите цели врз основа на резултатите што тие ги сакаат
Ако сакате да ги вработите најпосветените, иновативни луѓе, тие што секој работодавец ги сака, морате да дадете јасно до знаење дека работата во вашиот тим нема да биде стандарден договор од типот „ти ја работиш работата што ни треба, а ние ќе се погрижиме тоа да ти се исплати“. Гаснер Отинг истакнува дека на конкурентен пазар, морате да покажете дека вашата можност ќе ги заинтересира; морате да ги врамите улогите и одговорностите на работното место како решение што другото лице го бара.
Ова значи дека треба да откриете каков индивидуален проблем се обидуваат да решат, дали станува збор за дневни обврски од различен вид, или потреба од флексибилност за да можат да ги задоволат домашните потреби, или брзо качување по компаниската скала или одреден вид статус или компензација. И потоа морате да покажете како целите на организацијата ќе ги обезбедат соодветните услови за тие да најдат задоволство и смисла.
Охрабрете ги вработените да бидат искрени и отворени на работа
Луѓето во денешно време копнеат да бидат такви какви што самите се гледаат дека се, а не само да изведуваат сет однесувања или манири што ги приморуваат да се „маскираат“ за време на работниот дел од денот. Невообичаен оптимизам што може да се забележи во екот на пандемијата на Ковид-19, според Гаснер Отинг, е што вообичаените празни разговори во понеделник наутро или покрај канистерот за вода сега се елиминирани, особено поради тоа што многу луѓе работат од дома. Невозможноста да се постигне вистинска рамнотежа помеѓу професионалниот и приватниот живот сега е излезена на виделина, и речиси сме приморани да направиме интеграција од работата и приватниот живот, бидејќи „можеш да го видиш мојот живот, можеш да видиш кој сум“ за време на сите тие видео состаноци, па така луѓето природно се повеќе фокусирани на „сериозните разговори за смислата и целта“.
Таа верува дека промената значи дека „можноста да се разговара за она што навистина ги ангажира, мотивира и инспирира луѓето со кои работите ќе биде полесно од кога било порано, бидејќи не можеме да не ги водиме тие разговори сега“. Како што колегите стануваат се` повеќе свесни за животите и грижите на другите, тие можеби ќе имаат поголема волја да ги прескокнат површните разговори и протоколи за да бидат сигурни дека можат да генерираат значајни исходи преку соработка. А тоа е многу потешко да се направи ако поединците треба да се преправаат дека се некој кој не се само за да го истераат побрзо работниот ден.
Прифатете го фактот дека ако сакате да ги задржите најдобрите, компензација или некакви поттикнувачки награди се само површни влогови
Како што постарата генерација Икс и милениумците се движат низ работната сила, и како што навлегуваат припадниците на генерацијата Зед, сведочиме дека се` поголем акцент се става на целта и смислата. Шансите се поголеми сегашните нововработени да бидат мотивирани од нивните сопствени вредности, а не само од надворешните награди како плата или ситни задоволства. Гаснер Отинг смета дека работодавачите грешат кога претпоставуваат дека помалку задоволен член на тимот ќе биде среќен ако добие малку повеќе пари, кога она за кое навистина се грижи е „да ги покаже сопствените вредности преку работата“. Организациите што внимаваат и се доволно мудри да научат што е тоа што го тера секој поединец да се ангажира, ќе откријат дека ќе можат да добијат повеќе со поддршката на ангажманот на заедницата, специјалните проекти, и филантропија, наместо со единствениот фокус на бонуси и компензации што би требало да го поттикнат вработениот да биде поефикасен.
Денешните предизвици можат да бидат особено исцрпувачки, и многу луѓе работат повеќе од кога било порано за да можат да ги издржат многубројните моментални несигурности. Но, ако лидерите се волни да вложат во запознавањето на сите членови на тимот и да видат кои навистина се тие, и им помогнат да најдат „созвучје“ со тоа што ќе ги подредат нивните одговорности со нивните лични вредности, тогаш има многу поголеми шанси и вработените и организациите да искусат раст и успех заедно.
Извор: Forbes
