На вчерашната седница на Владата се усвоија низа заклучоци со кои им препорачува на работодавачите да организираат работа од дома, а на маркетите, аптеките, банките и поштите да обезбедат редари пред и во своите објекти.
Поврзано:
- Како да ја одржите продуктивноста при работа од дома
- Домашниот товар на жените туку што стана потежок со пандемијата на коронавирусот
- Корона вирусот влијае на глобалниот бизнис, но некои индустрии успеваат да растат и во услови на пандемија
„Се препорачува на сите работодавачи во Република Северна Македонија, односно секое раководно лице на институцијата, во зависност од типот на работата и можностите, да ја организираат работата и начинот на работа на вработените лица, преку работа од дома, без да се наруши редовното и нормалното функционирагье на институцијата,“ се наведува во заклучоците на Владата усвоени врз основа на препораките од денешниот состанок на Главниот координативен кризен штаб задолжен за целосна координација со спречувањето на внесување и ширење на коронавирус Ковид-19.
Супермаркетите мора да постават редари пред влезот
Оваа мерка не важи за вработените во министерствата за внатрешни работи, за здравство и за одбрана, како и во Армијата, противпожарните територијални единици, Царинската управа и домовите за нега на стари лица и малите групни домови.
Дополнително, сите маркети, аптеки, банки и објекти кои даваат поштенски услуги, се обврзуваат задолжително да обезбедат редарска служба при влез и да обезбедат контрола на бројот на лица внатре во објектите, со цел обезбедување минимум потребно растојание од два метри помеѓу лицата пред и во објектите.
