Кога се користи на соодветен начин, маркетинг психологијата може да биде ефикасна алатка за зголемување на свесноста на потрошувачите за вашиот бренд, и има потенцијал да ја зголеми добивката. Психологијата игра важна улога во процесот на носење одлуки, така што маркетингот и психологијата одат рака под рака кога станува збор за предвидување на реакциите на потрошувачите во однос на производите или услугите што се нудат. Важно е да се користи соодветната психолошка техника за маркетинг кампања. На пример, кога има страв од недостаток, психологијата на човечката природа го тера лицето да истрча надвор и да го купи производот или услугата дури и по ризик да биде прилично осиромашен, пишува Business News Daily.
Многу е тешко да зачувате нечие вниманието подолго од пет секунди. Социјалните медиуми се особено податливи за „брзи вести“ поради постојаните известувања за нови информации на повеќе платформи. Со цел вашиот бизнис да успее, треба да најдете посебни начини да се поврзете со вашите потрошувачи и преку вашите маркетинг активности, да ги охрабрите да делуваат.
- Прашања што менаџерите за продажба треба да ги поставуваат во моментов
- Како да размислуваме поефикасно за време на криза
- Како да се справиме со последиците од животот со коронавирус
„Мотивациите што ги тераат луѓето да делуваат се исти онлајн и офлајн,“ истакнува Рејчел Клеменс, маркетинг директор во Mighty Citizen. „Одличното раскажување приказни ги трогнува луѓето, без разлика на медиумот. Јасното брендирање, пријатниот дизајн и технологија која е лесна за употреба ги поттикнуваат луѓето да почнат да дејствуваат, без разлика дали е тоа преку вебсајт, онлајн оглас, ТВ реклама или па дури и состанок лице-в-лице.“
Како психологијата се користи во маркетингот
Конципирањето на психологијата како маркетинг стратегија е одличен начин да ја натерате јавноста да го забележи вашиот бренд помеѓу милионите други можни содржини што би го одвлекле вниманието на интернет корисникот во тој момент. Ако научите кој елемент ги тера купувачите да се ангажираат во интеракција со вашите реклами и ако дознаете во кој момент е најверојатно да купат нешто, тогаш можете да го канализирате тоа знаење за да привлечете потенцијални клиенти. Во продолжение се неколку совети како да ја искористите психологијата за да ја подобрите вашата маркетинг стратегија
Обезбедете контекст
Иако вашите муштерии купуваат онлајн, сепак сакате да им обезбедите искуство како да се во вистинска, физичка продавница. Наместо едноставна понуда на производот или услугата, секогаш обезбедете дополнителни информации за да го направите искуството на потрошувачот лично.
„Кога носат одлуки, луѓето сакаат контекст,“ вели Клеменс. „Тие сакаат да знаат што другите прават, и се склони да го одберат истото.“
Организирајте ги вашите производи според цена и важност, или врз основа на купувачката историја на вашиот клиент. Кажете им на вашите муштерии кои производи се најпопуларни за да се чувствуваат посигурни во нивниот избор.
Користете претходно дефинирани листи за проверка
Голем број компании експериментираат со претходно подготвени листи за проверка, преку кои на муштеријата автоматски му се нудат неколку различни опции при излез од продавницата (или при напуштање на сајтот за продажба). Примери за ова е можноста да платите дополнително ако сакате пратката да ви стигне дома порано од наведеното, или да станете дел од мејлинг листата на компанијата.
„Кога една опција се бира од претходно подготвена листа, има многу поголеми шанси луѓето да ја прифатат,“ Клеменс образложува, „за возврат, организациите прават многу повеќе пари и ја растат сопствената мејлинг листа побрзо.“
Сепак, забележува таа, имајте обзири кон вашите клиенти. Ако ги одбирате тие опции на нивен трошок, муштериите ќе го забележат тоа и ќе ја изгубат почитта што ја имале за вашата компанија.
„Ако ги натерате вашите корисници да се почувствуваат измамени тогаш тоа е сигурен начин да ги изгубите,“ потенцира Клеменс.
Понудете дополнителни производи/сервиси на крајот на секоја трансакција
Кога потрошувачите се во процесот на напуштање на продавницата (виртуелна или физичка), вообичаено тие се поотворени за дополнителни куповини отколку кога едноставно разгледуваат што нудите. Искористете ја оваа можност за да им покажете други производи и понуди што би можеле да ги интересираат. На пример, ако имаат пар фармерки во нивната количка, а вие во моментот имате продажна акција „купи еден, добиј 50‘% попуст на вториот пар“, известете го муштеријата за оваа понуда пред да ја направи порачката.
Ако веќе платиле за производите, следете ги следниве предлози. „Ако вашите корисници веќе донеле одлука… полесно им е ако донесат уште една мала одлука,“ објаснува Клеменс. „Организациите можат да ја искористат оваа ситна тактика на пораките со благодарност што ги испраќаат до нивните клиенти, или во потврдни пораки за да додадат дополнителна вредност на нивните производи или услуги.“
Искористете го моментот познат како „социјално стадо“
Ако вашите клиенти видат дека многу луѓе купуваат некој одреден производ, и тие ќе се чувствуваат наведени да го купат. Создавањето дигитална заедница за вашите муштерии ќе ì помогне на вашата компанија да биде поуважена и да ја зголемите продажбата.
Овој концепт се нарекува „социјално стадо“, или „праксата кога присуството на компанијата онлајн создава чувство на заедница,“ вели Клеменс. На пример компанијата Aerie создаде маркетинг кампања која ја нарекоа „Реална Aerie“ (#AerieREAL). Преку пораките во кампањата, компанијата ги охрабрува жените од сите можни конфекциски броеви да се чувствуваат удобно во сопствената кожа, а истовремено кампањата преставува и голем поттик за приходи. Движењето врши позитивно влијание во општеството додека паралелно се рекламира брендот. Уште еден пример е „Предизвикот со кофа полна мраз“ – иницијатива која успеа да го привлече вниманието на луѓето низ целиот свет преку различни социјални канали и која собра 115 милиони долари за време на летото во 2014 год.
„Хаштагови и ,рачки’ (имињата на иницијативи, фирми, општи места пред кои стои знакот @) се користат за да се шири пораката и да се тагнуваат други лица за да учествуваат,“ истакнува Клеменс. „Тие кои учествуваат чувствуваат социјална сродност со другите кои исто така зеле учество и така се раѓа виртуелно искуство.“
„Луѓето се животни во чопор,“ додава Клеменс. „Сакаме да ја следиме толпата. Ако видиме како други прават нешто, склони сме и ние да се приклучиме“.
Придржувајте се до принципот на реципроцитет
Реципроцитетна психологија во принцип значи дека за да добиете нешто, мора прво да дадете нешто. Во бизнисот, ова би значело дека за да остварите продажба, прво треба да му дадете нешто на клиентот.
Кога на вашите нови муштерии им нудите додадена вредност, всушност ја отворате вратата кон еден деловен однос со нив. На пример, поседувате бизнис што дава услуги и врши поправки на системите за греење и вентилација, реципроцитет би било ако нудите и бесплатна проценка дали се губи енергија што би можело да биде резултат на расипан систем за греење. За возврат, клиентот ќе биде благодарен за „бесплатната“ услуга што сте ја обезбедиле, и можеби ќе купи нов систем за греење и вентилација од вашата компанија. Употребата на реципроцитетната психологија во маркетингот може да биде од корист за многу нешта, како што е стекнувањето нови клиенти и стекнување лојалност од страна на истите.
Повикајте се на чувството на недостаток и итност
Популарна убедителна техника е повикувањето на чувството на итност и на недостаток, што значи претставување на производот/услугата како можност која е достапна само во текот на ограничен временски период, или како да се останати само неколку парчиња од тој конкретен производ. На пример, продажбите за „Црниот петок“ ги рекламираат популарните производи со најави за ограничени количини, што го вклучува чувството на итност за купување. Преку маркетингот што се фокусира на елементот на недостаток, потрошувачите природно се плашат од идејата дека ќе ја пропуштат понудата, па така, ќе преземат нетипични чекори за да ги добијат тие производи. Затоа можеме да видиме муштерии како стојат во долги редови со саати, уште рано наутро, со единствена цел – да се осигураат дека тие ќе дојдат до производот први, пред кој било друг да го земе.
Користењето на психологијата во маркетинг е идеален начин да се разбере и предвиди она што потрошувачите го мислат за вашиот производ или услуга, и начинот на кој би го купиле. Сепак, исклучително важно е да бидете сигурни дека го користите соодветниот вид психологија за вашата специфична цел на полето на маркетингот.
