Како подобро да управувате со готовинските текови и да планирате за иднината

Која е една од најважните мерки по однос на здравјето на кој било бизнис? Готовинските текови – тие се показател за тоа колку пари влегуваат и излегуваат од вашиот бизнис. Робустен готовински тек е добар знак за иднината. Но дури и кога се внесува висока стапка на готовински тек, лошото менаџирање може да спречи бизнис со потенцијал за раст вистински да се развива.

Имајќи го тоа на ум, стратегиите во продолжение на оваа статија можат да им помогнат на сопствениците на бизниси подобро да ги менаџираат готовинските текови, а за возврат ќе бидат во можност да постават цврста основа за здрава, успешна иднина. На крајот на краиштата, менаџирањето на готовинските текови изискува повеќе од едноставно кратење трошоци и обиди да се остварат повеќе продажби.

Водете евиденција на фактурите

Плаќањето за голем дел производи или услуги ретко е моментално. Тоа значи дека сопственикот на бизнисот треба да води грижа за тековната сметка.

Развијте систем преку кој ќе можете да генерирате, да испраќате и да ги следите сите фактури за да бидете сигурни дека нема да пропуштите да направите исплата и за да бидете во тек со заостанатите плаќања. Иако „бркањето“ фактури не е забавно, дел од управувањето со бизнисот е да се осигурате дека навистина добивате исплати за сите продадени стоки и услуги.

Планирајте го најдобриот исход но подгответе се за најлошиот

Како сопственик на бизнис, растот е возбудлива работа. Кога работите одат на добро, сопствениците паѓаат во искушение да го одржат моментумот со постојано трошење. Но, долгорочниот опстанок често зависи од еден конзервативен пристап.

Бидејќи готовинските текови можат да бидат непредвидливи, особено за новоосновани и сезонски бизниси, секогаш е добра идеја да имате доволно заштеда на страна за да се покријат затишјата во побарувачката или неочекуваните трошоци, како на пример расипана опрема. Точната сума ќе варира во зависност од специфичностите на вашиот бизнис, но општо прифатено правило е да целите да имате доволно пари при рака со кои ќе можете да ги покриете трошоците во период од три до шест месеци, вклучувајќи плати и инвентар.

Ако го следиме истото размислување, може да паднете во искушение да правите екстравагантни трошоци на инвентарот на почетокот за да бидете добро подготвени за растечката побарувачка. За несреќа, вишокот инвентар е скап – тој може да изгуби од вредноста со текот на времето или дури да има рок на траење што ќе истече, што пак значи дека вашиот бизнис ќе претрпи дополнителни трошоци. Како резултат на тоа, подобро е да имате постепен пристап кон прибирање инвентар општо земено, и да го зголемувате снабдувањето со побарувачката од вашите клиенти.

Внимавајте на подигнатиот кредит

Започнувањето, растењето и одржувањето на еден бизнис често пати вклучува земање заем, за да можете да инвестирате во опрема, инвентар и исплата на плати. Тоа е пресметан и неопходен ризик. Но не сите кредитни линии се исти. Кога позајмувате, обрнете посебно внимание на исплаќањето на заемот, каматните стапки, условите и сите фактори што ќе влијаат на готовинските текови.

Кога вашиот бизнис остварува профит, лесно ќе најдете нешто на што ќе можете да потрошите пари. Нова технолошки опремена канцеларија е примамлив предлог, но би било внимателно од ваша страна доколку на време размислите дали секое купување што го правите го подобрува здравјето на вашиот бизнис. (Непотребна модерна канцеларија? Најверојатно не. Инвестирање во нов, посигурен систем? Најверојатно тој трошок вреди да се направи).

Обидете се да избегнувате ситуации во кои, поради непотребни трошења, ќе треба да барате дополнителни заеми со полоши услови. Вашиот иден успех зависи од паметните стратегии што ги имплементирате денес.

Извор: Entrepreneur

поврзани статии

ОСТАВЕТЕ ОДГОВОР

ве молиме внесете го вашиот коментар!
ве молиме внесете го вашето име овде

прочитај повеќе

- Advertisment -