Зошто убедливоста е поважна од имањето добра идеја

Како продукт менаџер најпрво во Гугл, потоа во Редит и Пинтерест, Тајлер Один знае по нешто за моќта на убедувањето, пишува entrepreneur.com.

Тајната, вели тој, не лежи во имањето идеја што мислите дека ќе го промени светот. Туку станува збор за тоа да ги натерате луѓето да го делат вашето мислење.

„Реалноста е дека визионерите како Стив Џобс не биле успешни бидејќи смислиле нешто неверојатно и оригинално туку така,“ Один изјавил во интервју во 2018 год. „Напротив, тие имале дарба постојано да убедуваат голем број луѓе да ги следат на нивниот пат кон нешто неверојатно и оригинално.“

Один држи говори на тема убедливост со години, и се повикува на принципите што психологот Даниел Канеман ги наведува во неговата книга „Брзо и бавно мислење“.

Канеман истакнува дека мозокот има два система преку кои доживува информации: првиот систем е брз, автоматски и во голем дел несвесен. Вториот систем е бавен, намерен, и бара подлабоко, поаналитичко размислување.

Кога станува збор за креирање аргумент или порака, не е доволно само да сте логично исправен. Додека некоја идеја може да му се допадне на вториот систем, сепак треба и првиот систем да функционира.

„Кога набљудуваме што е тоа во што успеваат визионерите, гледаме дека тие ни нудат конзистентен и кохерентен план, и самодоворба што нè тера да се чувствуваме безбедни,“ вели Один.

„Им веруваме не затоа што нивната визија е совршена, туку затоа што ја држат под конторла. Тие комуницираат јасно, без да ни ги дадат сите одговори. Она што луѓето го мислат дека е визија во суштина е убедување.“

Да се биде успешен претприемач изискува многу повеќе од убедување луѓе да го купат вашиот производ или да инвестираат во вашата компанија. Успехот значи создавање длабока мрежа на конекции кои го делат вашиот ентузијазам за вашата идеја и за како таа ќе се развива. Во продолжение се неколку идеи како да започнете.

Воспоставете кредибилитет

Според грчкиот антички филозоф Аристотел, покрај патосот – привлечноста кон емоции, и логосот – привлечноста кон логични аргументи, добриот караткер или етос, е едно од трите столбови на убедливиот говор. Ова резонирање се должи на следниве факти – без разлика колку одреден аргумент е добро размислен или логичен, публиката нема да го земе предвид ако нема доверба во лицето кое го изложува.

Своето излагање на ТЕД конференција за реформи во криминалниот и правниот систем, адвокатот Брајан Стивенсон кој работи во областа на човековите права, го отворил не со список на стекнати дипломи или добиени престижни награди, туку со изјавата: „Го потрошив поголемиот дел од моето време во затвори, притвори, кај затворениците што чекаат смртна казна. Поголемиот дел од моето време го поминав во сиромашни заедници во социјалните квартови и места каде што има голема мера на безнадежност.“

Оваа информација е далеку поважна за слушателите кои не го познаваат, или зошто треба да му веруваат на она што го кажува.

Уште една интегрална компонента за воспоставувањето кредибилитет, секако е чесноста. Една единствена лага или погрешно толкување често пати може да е доволно за да предизвика трајна штета на професионалната репутација.

Како што вели Ворен Бафет: „Потребни се 20 години за да се изгради репутација и 5 минути да се уништи.“

Слушајте вистински

Кога станува збор за убедливост, многу е важно да им покажете на луѓето дека можете да обезбедите вистинско решение на проблемот.

За ова да се постигне на ефикасен начин, морате да ја слушате вашата публика за вистински да разберете што ì треба и како можете да им помогнете.

Поголемиот дел од луѓето ја преценуваат сопствената способност да слушаат. Но важна вештина е да го негувате слушањето на другите ако самите сакате да бидете поубедливи.

Кога зборувате со некој, посветете им го вашето целосно внимание. Гледајте ги во очи и користете го нивното име во текот на разговорот. Не прекинувајте. Ваквото однесување испраќа покана дека ја цените личноста и нејзиното мислење.

Уште повеќе, истражувањата покажуваат дека ако сакате да убедите некој, подобро е да слушате внимателно и да одговорите врз основа на нивната перспектива. Со време, довербата што се создава со внимателно слушање ќе му овозможи на лидерот да влијае на одлуките.

Направете го вашиот глас ефикасен

Една од убавите работи во уметноста на убедувањето е дека оваа техника е непроменета веќе 2000 години. Ова делумно се должи на непроменливата природа на опсегот на нашето внимание.

„Аристотел открил дека постојат прилично објективни граници во поглед на количината на информации што кој било човек може да ги апсорбира и задржи,“ вели Едит Хал, професор на колеџот Кинг, и автор на „Патот на Аристотел“. „Кога станува збор за убедување, помалку е секогаш повеќе.“

Кога се обидувате да направите поента на убедителен начин, според Аристотел, треба да го истакнете аргументот „што покомпактно и со што помалку зборови“.

За да го постигнете ова, исфрлете го секој невообичаен или редок збор од пораката што сакате да ја испратите. Според Один, ако аргументот што сакате да го искажете е премногу густ, вториот систем ќе биде повикан да го анализира, а првиот систем нема да има шанса ниту да се обиде да сфати за што станува збор.

Во таа насока, Аристотел исто така заклучил дека првото нешто што го кажувате е најважно, бидејќи „вниманието опаѓа на секое друго место освен на почетокот“. Со други зборови, воведот треба да е силен, бидејќи тогаш вашата публика е најмногу сконцентрирана на вас.

Раскажете приказна

Ако нешто му се допаѓа на првиот систем кој често се однесува како дете, скоро и да нема ништо поефективно од добро раскажана приакзна. Луѓето внимаваат на различен начин кога слушаат раскажување наместо голи факти – особено кога раскажаното се повикува на нивните интереси. Според анализа изработена во 2014 год, од 500те најпопуларни предавања на ТЕД конференции на сите времиња, приказните зафаќаат 65% од предавањето на просечниот говорник.

Како да го искористите раскажувањето приказни за убедувачки цели? Клучот е да создадете врски помеѓу она што вашата публика го мисли и она во што веќе верува, и она во што сакате вие тие да поверуваат. Вметнувајте факти што ќе додадат кредибилитет, и користете го или вашиот личен пример или примерот на некој кој го познавате лично.

Што се однесува пак до одбирањето на соодветна приказна, корисно правило е фактот дека најличната содржина е таков вид податок со кој повеќето можат да се поврзат.

Еден од кураторите на ТЕД конференциите, Крис Андерсон вели: „Приказните што можат да ги создадат најдобрите врски се приказни за вас лично или за луѓе кои вам ви се блиски. Приказни за неуспех, чувство на непријатност, лоша среќа, опасност или катастрофа, раскажани на автентичен начин, го забрзуваат поврзувањето на длабоко ниво.“

Имајте верба во себе

За да можат другите да веруваат во вас, прво вие морате да верувате во себе.

Размислете: дали има повеќе шанси да верувате во некој кој делува анксиозен и несигурен, или во некој кој зборува со авторитет?

Кога зборувате, луѓето почнуваат да носат одлуки како резултат на начинот на кој комуницирате. За да проектирате самодоверба, зборувајте мирно, на јасен начин, со директни реченици. Целта не е да звучите како робот, туку како способна личност, која е добро подготвена и информирана. Обидете се да одбегнувате „узречици“, како „на пример“, „значи“, и фамозното „Ааа“. Ако ви е од помош, напишете што планирате да кажете пред да го кажете тоа. Дури и да чувствувате дека сте исполнети со сомнеж во самите себе, глумете – додека говорењето во јавност, или пред други, не ви стане навика.

поврзани статии

ОСТАВЕТЕ ОДГОВОР

ве молиме внесете го вашиот коментар!
ве молиме внесете го вашето име овде

прочитај повеќе

Над 15% пад на индустриското производство во месец јуни

Индустриското производство во јуни оваа година, во однос на истиот период лани, е намалено за 15,1%, покажуваат податоците на Државниот завод за...
- Advertisment -