Градењето бренд не е среќна случајност туку внимателно планирање на деловните чекори

Се` што ви треба е идеја, малку смелост, и празна гаража за да можете да го лансирате новиот глобален бренд, така? Ова е приказната која со задоволство ја „голтаме“ со години. Можеби овој пример објаснува зошто идеи како Juicero и MoviePass не само што ја видоа светлоста на денот, туку и беа дарежливо финансиски поддржани пред да доживеат спектакуларна смрт. Или зошто, според Wall Street Journal, и покрај бескрајната празнина што е сега карактеристична за здравствената и економска криза, стапката на апликации за регистрација на нови бизниси во САД е сега повисока од претходните 13 години .

Да, бариерите на патот на растење на бизнис се зачудувачки ниски, но во исто време тоа не е точно кога станува збор за градење бренд. Знам што мислите сега: „Нели „бренд“ и „бизнис“ се синоними? Не мислам така. Бизнисите продаваат работи; брендовите ве тераат да чувствувате. Бизнисите можат да се создадат преку ноќ; брендовите се градат со тек на време. Бизнисите се поседувани; брендовите се заеднички. Вистинските брендови, тие што навистина ни се при срце, обезбедуваат наследна, нематеријална вредност, цени Брит Бут, експерт по маркетинг со долго искуство во водење креативни тимови, креирање бренд и умно лидерство.

Така што, како создавате вредност поголема од она што го продавате и на страна од вашите клучни клиенти? Кога им го поставувам ова прашање на основачи на бизниси во рана фаза, тие често се расфрлаат со зборови и се бунат кога зборуваат за „цел“, „визија, „мисија“ и „вредности“. Но овие звучни термини не означуваат иста работа. Тие се одделни градежни блокови на рамката на вашиот бренд.

За да почнете да ја создавате вашата сопствена рамка, следете ги овие чекори:

Дефинирајте го вашето „зошто“

На врвот на рамката за вашиот бренд е поставена целта, или причината зошто го правите тоа што го правите. Тоа е отворена покана за забава – причината зошто на јавноста и` се допаѓа вашиот бренд, се претплатува на него, коментира под вашите постови на социјалните мрежи и ги споделува вашите информации, но и причина да верувате во она што му го давате на светот.

Кога потрошувачите се претплатуваат за вашата цел, тие ќе бидат тука за вас. Истражување спроведено од Zeno Group откри дека потрошувачите имаат четири пати поголеми шанси да купат производи на брендови што имаат силна цел. И анализа спроведена од Accenture за портфолиото на брендови на Unilever, заклучи дека брендови што се фокусираат на повисока цел, како што е Dove на пример, чии напори одат во насока на зголемување на нивото на самодоверба на девојките со помагање да ги отфрлат конвенционалните стандарди за убавина, растат за 50% побрзо од останатите брендови и обезбедуваат повеќе од 60% од целокупниот раст на Unilever.

Запомнете: „зошто“ е основата од која почнувате. И за време на ова патување, сметам дека е од помош ако го имате на ум следниот цитат од Сајмон Синек: „Луѓето не го купуваат она што го правите, туку ја купуваат причината зошто го правите тоа“. Синек ја поставува причината во центарот на неговиот „Златен круг“ и од неа го изведува и гради „како“, и на крај „што“. За да го поставите тоа „зошто“ во центарот, запрашајте се: Против што се борите? За што се борите? Кои се вашите конкурентски предности што ќе ви овозможат да опстанете во овие борби? Што ќе биде поразлично во светот откако ќе ја остварите таа цел?

Пронајдете ја вашата насока

Под целта е сместена визијата која ве насочува таму каде што сакате да одите. Pangaia е бренд што неодамна го забележав (и почнав да купувам негови производи), бидејќи претставува одличен пример. На прв поглед, продава облека, но со само неколку „скролања“ надолу, сфаќате дека брендот користи научно добиени материјали за да ја спаси планетата.

Фирмата успеа да привлече огромен број следбеници за кратко време, продавајќи ни тренерки и маици со кратки ракави. Неговите клиенти, вклучувајќи ме и мене, објаснува Бут, купуваат нешто поголемо од модерен блузон. Ги трошиме нашите пари на Pangaia бидејќи веруваме дека овој бренд може да стори добро во светот и сакаме да го носиме на нашиот ракав – буквално.

Не се обидувајте да натурате визија за брендот врз основа на она што е тренд во моментот. Наместо тоа, играјте си со вашите силни страни. Во што сте добри? Што знаете? На кој начин вашите вештини го поддржуваат вашиот пат? На пример, Pangaia е составена од креативни лица кои работеле за луксузни модни брендови и научници со искуство во био-производство. Комбинацијата на овие две многу различни способности создава единствена и возбудлива стратегија во борбата против климатските промени.

Поплочете го вашиот пат

Следна доаѓа мисијата. Со други зборови, како ќе ја остварите вашата визија. Pangaia работи на сочувување на нашата планета со тоа што комбинира мода и наука за одржливо производство на облека, па така, компанијата им дава на потрошувачите причини да купуваат поради нејзиното „зошто“. Компанијата користи колаборативна филантропија за да ја поправи планетарната штета и за луѓето да имаат корист. Во октомври, Pangaia создаде колекција на блузони со качулки и маици со кратки ракави со брендот Costa Brazil за да ги поддржи селата во Амазонија, каде модната индустрија историски остава уништувачки јаглероден отпечаток. Сите приходи од колекцијата беа искористени да се обезбеди лична заштитна опрема и други медицински потребштини до далечните села и помогна во распределбата на доктори во тој регион, кои беа потребни во борбата против коронавирусот.

За да ја исцртате вашата траса, размислете како да ја искористите вашата мисија мултидимензионално. Од кој агол можете да им пристапите на вашите цели што ги поставивте кога го одредивте вашето „зошто“?

Сторете го тоа што велите дека ќе го направите

На крај, вашите вредности се тие што одредуваат како ќе се однесувате во текот на патувањето. Дали целата ваша компанија е олицетворение на вашето „зошто“? Дали вашата мисија е подредена со вашата визија?

Иако одговорите на овие прашања треба да се потврдни, потрошувачите не очекуваат непогрешливост, и силната причина зошто може да ви обезбеди доза милост. Истражувањето на Zeno Group покажува дека шансите се шест пати поголеми потрошувачите да ги бранат и заштитуваат брендовите што се фокусирани на нивната цел откако компаниите ќе направат јавен гаф.

Но овие иницијативи можат да одат само волку далеку. United Airlines долго време ги кани патниците да летаат со оваа компанија. Но кога им се случи патник кој си го платил билетот насила да биде изваден од пребукиран авион, а извршниот директор на компанијата да ги брани тие постапки во медиумите следниот ден, јавноста забележа. Анкетите по инцидентот покажаа дека 79% од потенцијалните патници ќе одберат друга авиокомпанија, а 40% од испитаниците кажале дека ќе го сторат тоа иако друг авиопревозник значи поскапа авионска карта и подолго време поминато во патување.

Останете во игра

Брендовите не се развиваат од моменти на некакво сознание, ниту пак се развиваат случајно. Вашиот бизнис може има потреба внимателно да работи на развивањето на брендот со години, во текот на кои го дефинира идентитетот на брендот, а сепак јавноста да го перцепира како бизнис. Но, кога сте посветени на развивањето на рамката на вашиот бренд, ќе почувствувате победа. Почнувате со промената од продавање на потрошувачи до регрутација на гласноговорници. И тоа е тоа што ќе ве одржи на долг рок.

Извор: Entrepreneur

поврзани статии

ОСТАВЕТЕ ОДГОВОР

ве молиме внесете го вашиот коментар!
ве молиме внесете го вашето име овде

прочитај повеќе

Македонската Агенција за странски инвестиции и промоција на извозот со национален...

Десет македонски компании, кои заеднички изложуваат свои производи на националниот павиљон, оваа година учествуваат на дигиталното издание на Хановер Месе, пренесува бизнис...
- Advertisment -